闲话专栏丨黄皮，大热天喫的物事

沈一珠 2023-8-11 来源：海上一珠

“闲话”专栏，邀您以文会友，闲话人生！聚焦所见所闻所思所感，呈现当下生活状态！

饥食荔枝，

饱食黄皮，

酸甜解腻，

消暑顺气。

陪姆妈到医院去拆线，顺便再配点药。搀牢伊走出医院门口辰光，姆妈低仔头，轻轻交，又像煞是自说自话：谢谢，我也有迭份福气。听到仔，呆一呆，没接口，再想想，还是没响。姆妈平常一家头住，过日脚侪靠自家。

一个礼拜前头，姆妈勒屋里掼一跤，赶过去辰光，额骨头上还勒出血。送到医院各种检查，还算好，也就缝了两针。所以，迭段辰光，姆妈就客居勒阿拉屋里。

天热，麻烦的是一日三餐，一家门口味虽然差不多，不过，两代人的习惯还是斜气勿一样。比方讲，阿拉早上贪便当，常常是面包、咖啡、水果混一混；姆妈欢喜清粥、乳腐，或者配一只小馒头；再比方，阿拉烧菜候分克数，一盆红烧肉，一人两三块，当顿喫光；姆妈欢喜烧一碗肉要喫几天，常常是一碗饭一块肉，再勿伸筷子了。总以为，迭个是老人家长期养成的做人家习惯。所以，干脆采取分食制，一人一盆，包干。结果，几天下来，姆妈讲，喫太多，囤牢，勿适意了。

想想蛮有意思，做人做事，常常是满腔热情对人家好，偏偏勿见得是人家要的。所以，适可而止，无论喫的用的，勒拨人家的辰光，弄清爽是侬自家要还是人家要，蛮要紧。

天气热腾腾，消耗大，要补一补。因为热，太油腻又喫勿进，所以，推荐一样新鲜物事：黄皮，也叫黄皮果，人称岭南佳果，是每年大热天里才有的一种水果。黄皮果喫口酸酸甜甜，去油解腻，有消食顺气、清热解渴解暑等作用，另外，伊还对润肺止咳，保养呼吸系统有帮助。

黄皮蒸排骨，操作起来老便当：去核留果皮、果肉，切碎加糖做成黄皮酱，铺勒浆好的肋排上，清蒸就好。或者，黄皮清鸡汤：半只草母鸡汏清爽，斩成块，摆进烧开的水里，加姜片若干，大火烧开转小火炖40分钟左右；加入去核去皮的黄皮果，小火炖2、3分钟，加适量盐，若嫌酸，加点糖。