“50+闲话”专栏，正式开启！聚焦老友们的所见所闻所思所感，呈现50+生活状态！邀您以文会友，闲话人生！
江南初夏，
蚕豆煮饭；
小菜要鲜，
心地要宽。
△画作者丨沈一珠
今朝立夏，朝后起，大热天开始了。搿辰光，喫一碗蚕豆饭，是尝鲜，再勿喫，豆就老了；也是食补，初夏的绿颜色的豆豆，养肠胃。老祖宗讲，“出于天赋自然冲和之味”，才能补人。而搿两日的“天赋自然”，蚕豆是其中之一。《食物本草》里记，蚕豆“快胃，和脏腑”。老祖宗老早就有研究，蚕豆有祛湿、和脾胃、利脏腑的功效。
蚕豆饭好喫还便当。先，按二、三个人的量，可准备蚕豆1斤剥出豆瓣，大米两罐淘清爽沥干，肋排稍许，焯水沥干，火腿蒸熟切丁，春笋、泡发香菇各若干，侪切丁，备用。再，热锅冷油，肋排翻炒至焦黄，倒入笋丁、香菇丁、豆瓣和火腿丁翻炒均匀后，再倒入大米继续翻炒均匀，加稍许料酒、盐，再加适量水（新鲜大米的话，水加到与材料齐平），倒入电饭煲按下烧饭键就好。
至于水量，是需要自家摸索控制，欢喜喫软一眼的饭，水多点；材料里水分多，水少点。常烧饭的，凭手感；勿常烧的，总要喫过几趟夹生饭或者干粥烂饭之后，再会有体会。烧饭烧菜迭桩事体，要烧熟，可以写得出来，若要烧好，常常是只可意会不可言传。
再啰嗦几句，可能对有志于烧饭烧菜的人有点帮助。前两天去苏州三山岛白相，住农家乐，是搿种男人勒前台安排、女人勒灶台烧饭，屋前有种满时令蔬菜的自留地、屋后有鸡棚鸭圈的正宗农家乐。端上台子的菜，勿是活杀就是现摘的，味道老好。所以，小菜要鲜，新鲜顶要紧。
最后一天喫好饭，特为到后头厨房间去谢一声。女人四十多岁年纪，着一件红颜色细格子罩衫，身形苗条，眉清目秀，伊立勒乡下传统的大灶头前头，一边汏镬子，一边面带几分勿好意思：覅谢的，侪家常菜呀，阿好喫啦？灶头饭菜香呀，日日烧，熟练了。
所以讲，到后来，烧饭烧菜全凭手感，熟练蛮要紧。
搿天，阿拉正要离开，又有交关游客住进来，看到女人立勒灶间门口，还是一副糯笃笃样子，就去跟伊再会一声；听伊讲，今朝人多，怕忙勿过来，所以，临时请了两个帮工，儿子、媳妇等一些侪会从苏州市里回转来帮忙。所以，伊立勒门口，是送客人，应该也是勒等儿子媳妇。
搿大概是交关人的梦想，拥有一家自给自足的灶披间，配合大自然的节奏，每日现摘活杀，自家喫好，让人家也喫好，味道自然是好的。
来源：周到上海 作者：沈一珠
